Álvaro Pérez Becerra
Ola! Son Álvaro. Traballo desde o ano 2010 no sector cultural en Galicia, como produtor de contidos audiovisuais, de espectáculos e de eventos.
Comecei nisto da man dos actores Marcos Pereiro e Xosé A. Touriñán cando puxeron en marcha Airapro, a súa produtora. Fixemos varios programas para a Televisión de Galicia, lanzamos o primeiro traballo de Sés, ou organizamos a volta aos escenarios de Heredeiros da Crus e a súa primeira xira despois do regreso, entre outras tantas cousas.
No 2015, Javi Lopa e eu creamos Ainé, unha produtora de artes escénicas que en poucos anos consolidou un xeito de facer inédito no teatro en Galicia, e que tamén compartimos con Touri. Batemos todos os records de público con espectáculos como Somos Criminais, Unha noite na praia, Corentena, ou a adaptación teatral de Fariña, coa que ademais xiramos por toda España durante máis dun ano.
En audiovisual, o meu traballo xira desde hai un tempo ao redor dos proxectos de Undodez, a produtora que tamén comparto con Javi Lopa e Touriñán. Producimos contidos pensados para todas as pantallas, pero sobre todo, pensados para o público. Feitos en Galicia grazas ao talento de profesionais galegos. Os nosos últimos traballos en ficción foron Na Gloria e Amigos hasta la muerte -unha coprodución internacional con México para Amazon-. En televisión estreamos no último ano Recollendo Músicas e Nosoutras.
Desde hai un tempo en Undodez decidimos abrir unha liña de produción de animación para primeiros espectadores en galego, con vocación de chegar a moitos outros territorios. Bibopalula, a primeira serie musical de debuxos na nosa lingua, é o noso proxecto máis destacado.
Antes de traballar como produtor e produtor executivo fun director de produción de varios programas da Televisión de Galicia. Agora compaximo o meu traballo en Ainé e Undodez con traballos de consultoría en xestión artística, produción audiovisual e modernización e innovación no sector cultural.
Cada verán, en Castelo (Culleredo), participo na produción do festival Castelo Conta, unha das citas culturais máis destacadas de Galicia, relacionada coa promoción da tradición oral e a cultura no rural.
Desde o 2021 son tamén presidente da Academia Galega do Audiovisual, a institución que xunta a boa parte das e dos profesionais do sector.
Traballo en Galicia e en galego. Creo na importancia das estruturas sólidas e o emprego de calidade para facer forte a industria cultural, e aposto desde hai tempo pola modernización do noso sector a través da tecnoloxía e a calidade nos procesos. E sobre todo: o que fago, é para desfrutalo.